芳華絕代 (Closed)

每次經過芳華絕代，總見人頭湧湧😳。早排的起心肝訂位，終於有機會一試😎。研究餐牌，發現一人套餐比二人套餐抵食，於是就叫咗兩個一人餐。首先上枱嘅係小食拼盤（呢度係半份，另一半已秒速被人幹掉😆），有蝦餅，雞卷丸，素菜春卷同雞翼，全部都炸得香脆熱辣辣，個人較喜歡蝦餅同雞卷肉，頗惹味😋，雞翼就略嫌乾咗少少。主菜揀咗去骨海南雞配香油飯，雞肉頗為嫩滑，油飯充滿雞湯香味，唔錯。另一個餐係泰式鮮蝦炒金邊粉，蝦嘅份量出奇地多😮，亦夠鮮味，不過金邊粉嘅味道同平時食開嘅有啲唔同，甜酸味較弱，並唔係我最喜歡嘅味道。值得一提係灑喺碟邊嘅乾辣椒非常辣😵，如果唔係好食得辣，千祈唔好將佢撈勻。最後加錢食埋甜品，椰汁芋頭西米糕味道正常，椰青大菜糕入面嘅椰青絲有咬口，幾好食。總結而言，呢度嘅食物水準正常，但價錢略嫌偏貴，不過由於環境靚，如果鍾意打卡位嘅，都係唔錯嘅選擇。