Steik World Meats (Closed)

要搵一間環境好、食物好再加上價錢合理的餐廳慶祝唔容易。經過無數次的K11真係都唔知有間咁好既餐廳，可能因為咁所以我地好似包場咁，地方大，裝修靚坐得好舒服。揀左一個set dinner 加兩個前菜。一開始會有麵包籃，跟住小食有牛油果蟹肉。跟住set dinner 前菜叫左鵝肝，好味入口即溶。之後兩個另外點的前菜有青口同煙三文水。青口好多，細細仔好嫩好味，送埋好好食既薯條。煙三文魚就正正常常，有唔太特別。食到呢度已經好飽，因為個薯條好多食到停唔到口。跟住黎左龍蝦湯，好濃郁既龍蝦味，飲完個口都仲留住陣陣鮮味，不太稀不太杰，口感岩岩好。跟住主菜揀左美國西冷，medium 熟，好期待，因為呢度出名食扒。但食晒落比較普通，牛味不太重，有筋，食左一半太飽食唔晒打包。到甜品，望落似蛋糕，只係糖霜做的，甜甜地。仲有一碟送既甜品，朱古力雪糕，macaron。最後dinner set 包一杯普通餐飲。食物味道都okay, 但服務一流，個個侍應都好有禮貌好有笑容，加上浪漫環境，所以第一次寫食評推介呢度。