賞島咖啡屋

Open Now

Now Closed

約咗朋友嚟花墟買花，行完就去附近搵個地方食晏。路經花園街，見到有間「賞島咖啡屋」，門面幾吸引，以蘋果綠為主調，配上門外嘅小盆栽，環境清新舒服，一於坐低食個午餐～～餐廳午市有 Set Lunch 供應，定價由 $88-$188 不等，全部都配有沙律或精選餐湯及飲品。沙律菜好新鮮，入口清甜爽脆，非常醒胃。是日餐湯為番茄湯，湯身熱辣辣，酸甜度啱啱好。蒜香蜆肉花椒意大利麵 ($118)  蜆隻圍碟而上，擺盤好靚，賣相一流！蜆肉好飽滿，連殼一齊煮，大大粒又無沙，非常鮮甜。意粉軟硬度剛好，口感煙韌 Al dente，配上花椒，香辣惹味。西京燒比目魚 ($188)  比目魚同樣出色！魚肉雪白豐厚，質感滑嫩肥美，同甜甜嘅醬汁好夾，入口啖啖肉。配菜有薯蓉、啡菇同沙律，份量十足，值得推介。跟餐飲品有咖啡、茶或果汁等可供選擇，我哋點咗 Passion Fruit Soda 同 Yuzu Soda，前者充滿濃郁亞熱帶果香，而後者亦冰涼解渴，清爽香甜👍🏻各具特色。