新興小菜火鍋

Open Now

Now Closed

親戚到訪，老爸有命安排外出晚餐，一時間諗唔到去邊度食，表叔即話去觀塘街市新興小菜開餐，唔切反應老爸已經話好提議，事後才知佢兩老表係觀塘返工，經常幫趁。大排檔係街市樓上，雖然無豪華裝修，但坐得舒服仲有冷氣。坐低聽到廚房個爐頭猛火聲，鑊氣十足，睇牆上菜牌，菜式唔少得過酒樓。老爸同表叔唔知幾時閃，原來去左樓下街市買海鮮，再見人就拎住一條東星三隻花蟹，仲話加工費好平。佢兩老咁熟地頭，當然由佢發辦，先有沙薑凍豬手，除自來東星班、花蟹清蒸之外，其餘有黃金蝦、椒鹽鮮魷、鼓油王炒麵、豉椒鵝腸、金銀蛋莧菜，連紅酒啤酒，六個人飲飽食醉埋單都唔過千，低食!沙薑凍豬手豬手爽口彈牙絕不肥膩，入口有酒香，鋪在豬手上面的是新鮮沙碎，非普通白切雞薑蓉。椒鹽鮮魷鮮味、彈牙，脆漿薄兼鬆脆，椒鹽夠辣夠惹味。黃金蝦海中蝦炸得夠脆口，鹹蛋黃夠乾身，蝦肉仍保持鮮嫩，吃下外脆肉爽又美味。鼓油王炒麵夠鑊氣，好少會食到咁少油乾身，好食！