Nathanhouse (Closed)

係奧海城睇完戲都成8點半, 咁岩戲院門口就有間幾靚既餐廳, 唔洗四圍搵餐廳~頭盤焦糖北海道帆立貝. 三文魚籽.青芥末枝豆蓉以香脆炸雲吞皮盛住煎得金黃既帶子, 醬汁既芥辣味突出但唔OVER, 整體味道同層次都好豐富。餐湯薑汁西洋菜濃湯.香脆煙肉湯既質感濃厚, 啖啖菜既甜味, 伴上咸煙肉, 估唔到又幾夾。法式香草雜果仁.烤羊係羊既表面塗左層果仁碎, 增添口感。而羊肉中心呈淺粉色, 略嫌熟左少少. 但入口依然軟腍, 羊味濃香。薰衣草奶凍．士多啤梨凍湯好特別既味道, 奶凍細滑, 薰衣草味道係舌尖上融入至整個口腔, 非常清香! 伴上士多啤梨凍湯, 香甜唔會有一絲膩感。