美美小廚

Open Now

Now Closed

今日終於都早起，的起心肝去拜訪吓呢間一直都想幫襯嘅小店。先前聽朋友介紹過，但佢地開早，好似收下晝三點，對我呢啲夜鬼黎講，確實高難度去幫襯。朝早十點零入到舖，當其他客人都仲係食緊早餐嘅時候，店員問我想食乜，我直接話想食魚！佢話要等20分鐘，無問題。心裡暗喜，即係即蒸啦。想食好野，除咗廚藝之外，都貴乎係新鮮。叫咗出面食店少有得食嘅蒸一夜乾馬友，鮮呀！果種久違嘅咸鮮味，實在令人感動。上面舖咗少少薑蓉吊味，簡直錦上添花呀。聽到隔離幾檯食食吓都問叫攞啲辣椒醬，都好奇想試吓，點解檯檯都問。我係好鍾意食辣；但食蒸魚落辣覺得有啲嘥咗。最後都忍唔住𢳂咗一羹落去碗飯度，都好味喎。味有啲特別，好似泰國黃辣椒同少少蒜頭，同市面一般泰式或潮式唔同；同埋夠辣。