心之食堂 (Under Renovation)

銅鑼灣呢座大廈出名多餐廳，今次就揀左呢間日式小店。餐廳環境唔算好大，但都坐得好舒服，一對夫婦做負責人，感覺好溫馨，好似去左朋友屋企食飯咁。首先我地要左一份海膽，非常新鮮，完全唔腥，好鮮甜。之後要左呢度出名既帶子鵝肝包，用紫菜包住大大粒帶子，帶子入面再包住充滿油份既鵝肝，好好食呀！再黎一份李小龍卷，姐係炸蟹鉗卷，好脆，配合埋d青瓜，清新爽口。之後就到熱食，有蘆筍海老牛肉卷，牛肉包住蝦肉燒，好香。黑松露牛油帶子，牛油帶子已經好好食，再加埋黑松露更香，而且帶子好大隻，又唔會過熟。燒芝士翠玉瓜，一定要襯熱食，d芝士溶溶地好邪惡。香蔥石板牛舌，有d過鹹，如果淡翻少少會更好，但牛舌其實好爽口，完全唔會硬到咬唔開。最後以香草豬頸肉烏冬作為句號，好少喺湯烏冬用上咁多香草，但出奇地好香好夾。而且豬頸肉唔會太肥，燒到好香。烏冬又好滑。總括覺得呢度好適合同朋友慢慢食下野，傾下計，慢慢欣賞用"心"既製作。