老掌櫃東北菜館 (Moved) New Location

平時同老公二人最愛食東北菜，今日撞正老公舊曆生日，諗住食大佢，無意間比我係openrice揾到呢間唔錯嘅評語嘅小店。門口裝潢老北京感覺紅鐺鐺，入到去更有濃厚中國氣息，我一早打電話book左位加留半隻片皮鴨，當然如果大家無留定鴨佢都有機會比到你，但最好緊係預留定啦，以免一場歡喜一場空，我地7點到達餐廳，都見仲有位剩，不過慢慢好快就爆滿了。佢落單形式係比張紙筆你寫上菜餚名字或者相對號碼，我地一行二人叫左麻辣海哲頭，京蔥羊肉，雞絲粉皮，半隻片皮鴨。比左單後發現原來佢醉雞有拎奬！個餃子都好似好好食咁，好多人叫，仲想食個羊餡餅啊🥙！不過無咁大個胃口，唯有下次食。麻辣海哲頭，有麻香，又有大舊，唔太辣，好鬼惹味！其實本人本身就好鍾意食羊，所以我一定覺得京蔥羊肉好食，有少少似乾炒牛河，不過老公平時一般羊都覺得好味，佢話唔騷，所以唔太好羊嘅朋友仔都可以試下。雞絲粉皮佢溝左花生醬，甜甜地好開胃，又可以解辣，唔係啲一夾就斷哂嘅粉皮，軟硬剛好👍🏻最後，我大愛片皮鴨，半隻粉量剛夠二人食，皮雖然唔夠脆，但夠香，佢嘅鴨係帶有肉，如果你追求超班正宗片皮鴨得浸皮個啲，咁就唔岩你啦，不過我就好鍾意，因為夠鴨味，香甜新鮮。