德發小廚 (Closed)

上星期約靚女同僚提早食團年飯，到咗深水埗拿出地址按圖索驥找尋開飯各食家都介紹的德發小厨，兩人傻吓傻吓係北河街市附近打咗兩個轉先揾到，見到德發門口有位男士招呼緊客人應該係老闆，佢見到我哋生客亦好好招呼，難得亦好殷勤介紹菜式同甜品。原先叫蝦兩味，但係老闆話蝦太多兩個人係食唔晒，咁淨要咗黃金蝦同老闆極力推介嘅大富大貴，好！就到新年啦，大家都要大富大貴。結果只要咗兩個餸，留返個肚嚟裝甜品同兩大瓶酒。黃金蝦外殼香脆同蝦肉好爽，賣相都好靚仔。大富大貴嘅桂花魚起肉用金針雲耳蒸得好滑同有鮮味。甜品要咗心太軟同椰絲奶凍，兩人同一感覺都話椰絲奶凍正過心太軟。兩人最後要飲清兩大瓶啤酒同紅酒，來祝賀新一年大家都心想事成，健康快樂！