公館 (Moved) New Location

幾年前已經來過一次，是朋友40歲大壽包場，感覺都幾有特色同幾好食。這是第二次來此私房菜會所，D餸已經大部份唔同晒。經理話我聽D菜式係隨客人口味同喜好而慢慢修改。六小碟好似同以前差唔多，神仙茄子係我摯愛，再食番都幾過癮， 重有一碟係翠玉瓜絲拌海蜇皮，微辣，幾爽脆，都幾好食。牛展就薄咗D，分量可以多番些少。食完冷盤就上熱嘢，第一道就係炸威化鴿柳卷，幾年後再回味都一樣超好食。我朋友問攞少少辣醬點下，又幾配。另外幾個唔食辣，所以就齋食炸卷。跟住上咗碟燜豬蹄，超正！ 以為係糖醋汁，侍應話我知係梅子酒香燜元蹄。我怕肥只食瘦肉，朋友就肥瘦齊齊吞吃，羨慕死佢地食得咁盡興！值得推介係個老火湯，好似有螺頭冬菇眉豆之類，好鮮濃！炸黃花魚都OK啦，幾香口。隻紅槽焗雞都好好味，雞肉都幾嫩，不過已經好飽所以食一件仔就算。朋友將剩餘打包帶走。我問侍應可否訂三至四位，佢話要至少八位。 有時得幾丁人喎，如果有細枱就正！裝修都幾優雅，都幾適合請客。