老鍋台式火鍋 (京都廣場) (Closed)

麻甩佬同事準備打網球賽，同佢食餐好嘅預祝佢 贏，咁佢之後就可以請返我食飯🤭 一嚟到間餐廳，佢就話好似食過，仲要係幾年前嘅事。我心諗間間你都話食過嘅🤨 點知佢同老闆吹水，問以前舊舖係唔係喺尖沙咀？哈！原來佢真係食過！牆上貼滿老闆同唔同名人嘅合照，發哥都幫襯過，證明應該有料到🤪 《午市火鍋套餐 $299》就有交易。當我仲諗緊要花膠美人鍋定養生鍋嘅時候，仲養生過我嘅麻甩佬二話不說要個尚膳養生鍋。 湯頭呈奶白色，超級足料：大大條人參同勁多紅參、桂圓、紅棗、杞子、冬菇、蜂巢豆腐。淨係食湯料都飽。湯一落肚直情暖胃提氣，佢即刻講嘢大聲咗📢 秋冬進補一流, 同手腳冰冷講拜拜👋 雞牛豬三選一，打邊爐點可以冇肥牛。每卷肥牛共有兩塊，一定夠喉。另外仲有台灣蛋餃、墨魚丸、貢丸、魚皮餃同埋啲蔬菜，飯同米線二選一。 麻甩佬本身仲以為唔夠食，諗住加錢再叫，點知原來啲湯料真係唔惹少。最後我哋差唔多飲曬個湯底先走。