新麻蒲 BBQ (波斯富街) (Closed)

開始有少少涼意，又係打邊爐嘅熱門季節！今日A姐話要食韓式火鍋，唔通係主要食餐肉同腸仔嘅部隊鍋？跟住佢行吓行吓就嚟到平時食開韓燒，位於銅鑼灣嘅新麻蒲，乜新麻蒲都有火鍋食咩？原來近期推出由韓廚主理嘅韓式鍋物，分別有牛肉野菇韓鍋同人氣海鮮韓鍋，真係要即刻試試！人氣海鮮韓鍋湯底有兩款可揀，分別係正宗辛辣同清甜原味。咁食得韓式火鍋，當然係揀正宗辛辣啦！正宗辛辣唔算太辣，呢啲天氣食仲夠晒暖笠笠。人氣海鮮韓鍋入面嘅海鮮由韓國直送，夠晒新鮮同有保證。鍋內有蝦、青口、蜆、魷魚、扇貝同蔬菜等，份量都算多，兩個人食啱啱好。其中我哋就最鍾意扇貝，超鮮甜又厚肉；而蝦同魷魚都好彈牙，索晒正宗辛辣湯底嘅精華。夠晒過癮。最後飲埋成jar西柚果醋好滿足。