大吉居酒屋 (Closed)

今日喺中環做完野，去搵朋友食飯，去左以前一齊去過既大吉諗住食放題，去到發現原來餐廳已經轉型成居酒屋，單點食物並非放題，既然嚟到當然要試下啦。首先要左個軟殼蟹沙律，先講份量，足足有4件軟殻蟹咁多，而且每件都好大件，夠哂足料。而味道方面，炸得十分香脆，但又唔會好乾，加埋下面既沙律菜一齊食就冇咁熱氣。然後就到店員推介既秋刀魚刺身，首先貌相已經好吸引。加上秋天係秋刀魚最盛產既季節，所以味道真係寧舍鮮甜，少少腥味都冇，真係必試！由於係時令魚，menu係冇咖，唔係成日有得食，記得要趁秋天完結前嚟食最肥美既秋刀魚。食完魚同蟹，點少得蝦呢！我地要左份牛油燒大蝦。蝦肉夠哂彈牙，而且牛油味勁香勁香，吮埋蝦頭既蝦膏，一級棒！食日本野點少得壽司。今次要左個辣吞拿魚卷，吞拿魚經辣汁調味，加上脆卜卜既炸天婦羅碎，仲有上面既蟹子，相當有驚喜，真心好好食。而伴碟既醃薑都好爽，又唔太辣。最後店員拎左2件自家制柚子忌廉芝士蛋糕請我地食，出奇地送既甜品都好味，芝士蛋糕不嬲好漏，但加左柚子味恰到好處，變得好清新，為我地今餐畫上完滿句號。