渝味曉宇重慶老火鍋 (聚賢逸居) (Closed)

今日去完數碼港見客，經過堅尼地城食埋野返屋企，原來呢度都有渝味曉宇嘅分店，橫掂好耐都冇食麻辣火鍋，就喺度食。原來佢哋轉用咗QR code點單，真係比以前方便好多，基本上食材同埋湯底都冇乜大嘅變動，今次點左麻辣鴛鴦鍋。亦都因為冇咗點菜紙，唔係每種食材都有標示煮嘅時間，只有幾種菜式還有煮熟時間，起初都擔心有時會煮得太熟，但發現大部分煮來啲質素都保持到。四寶丸水準高，結實又彈牙。重慶耗魚兒係必點菜之一，煮15分鐘左右，魚肉嫩滑鮮甜，又冇乜骨。功夫萵筍片亦係我最鍾意嘅蔬菜之一，刀工切得薄，令到菜變得爽甜。嫩牛肉梗係要點嚟食，煮得耐仍然都好滑，牛肉味濃厚。