滿江紅 (Closed)

聽講要睇餐廳實力，最簡單嘅菜式就最顯功夫，唔知炸饅頭算唔算呢？唔知第幾次嚟呢度食炸饅頭🤤，睇下幾多人有同感先！最正嘅炸饅頭係外層有少少脆，真係少少就夠，太脆就似石頭😛 而入面要熱辣辣得嚟又要夠鬆軟。最緊要最緊要，亦都可以話係炸饅頭嘅靈魂，就係煉奶...無煉奶我寧願唔食，有咁多得咁多點落去、倒落去、又或者浸落去都得！😍😍😍講到滿江紅，無一碟紅紅地嘅又點得先？呢個「辣子雞」係我一個幾鐘意嘅菜式，貪佢夠哂香口，但次次食呢味菜嘅時候，我都覺得自己係度玩緊尋寶遊戲，因為要左挑右挑咁去搵啲雞粒出嚟另一味以前成日叫嘅菜係酸菜魚，記得一定係辣辣地嘅，但店員話酸菜魚係完全唔辣嘅...我真係完全唔敢想像到底唔辣嘅酸菜魚會係咩味道，所以我地就改左叫呢個「花椒清香桂魚」，味道都算唔錯，魚肉幾嫰幾滑，少少辣都幾過癮！(但我都係鐘意以前嘅酸菜魚😭😭😭)最後一定要加返個甜品，呢個「酒釀桂花小湯圓」做今晚嘅結尾就唔錯啦！清甜得嚟又帶啲酒香，感覺好清新，圓子食落又煙煙韌韌咁，好正😍呢間我都覺得係尖沙咀區幾值得食嘅餐廳，而家已經回味緊佢嘅炸饅頭！！