Video
Read full review
2023-07-17
2393 views
話說舊年媽媽生日我哋去咗天龍軒飲茶，今年因為夾唔到時間飲茶，決定去明閣試吓佢哋嘅晚飯。之前都試過灣仔明閣嘅盆菜，全家都好欣賞，所以今次決定去旺角本店試一試！ 今次book得比較遲，所以淨係得返8:30呢個時段，因為驚冇嘢食，我都預先打定電話去留定想食嘅菜式，留咗佢哋嘅叉燒同招牌炸子雞。 至尊蜜汁叉燒 （例） $298龍皇披金甲 （三位） $354明閣炸子雞（粉嶺平原雞）半隻 $398金耳榆耳扒菠菜苗 $248窩燒滋補竹絲雞炒飯 $298薑汁桃膠燉鮮奶 $68 至尊蜜汁叉燒 🥓如果要講我哋最鍾意嘅菜式，一定係叉燒同埋龍皇披金甲！佢哋嘅叉燒份量十足，而且肥瘦適中，食落啱啱好，唔柴唔膩，食到叉燒嘅油脂香但又唔會過猶不及，唯一差少少就係外皮燒得唔夠焦香，都有可能係健康嘅考慮，但對我嚟講就差少少😢 龍皇披金甲 🍤龍皇披金甲係另一款明閣必食嘅功夫菜，將蝦膠釀喺龍躉上，一齊攞去炸，食落外皮香脆，龍躉嘅魚油十分之香，估唔到兩樣海鮮咁嘅配搭出到嚟咁好食。每一份仲有蝦頭同蝦尾，可以食埋蝦頭嘅啲蝦膏，而蝦尾肉亦都好紮實，推介！ 明閣炸子雞🐓炸子雞係明閣另一招牌菜，但我哋食完好失望，冇想像中同其他食評講到咁驚
今次book得比較遲，所以淨係得返8:30呢個時段，因為驚冇嘢食，我都預先打定電話去留定想食嘅菜式，留咗佢哋嘅叉燒同招牌炸子雞。
至尊蜜汁叉燒 （例） $298
龍皇披金甲 （三位） $354
明閣炸子雞（粉嶺平原雞）半隻 $398
金耳榆耳扒菠菜苗 $248
窩燒滋補竹絲雞炒飯 $298
薑汁桃膠燉鮮奶 $68
至尊蜜汁叉燒 🥓
如果要講我哋最鍾意嘅菜式，一定係叉燒同埋龍皇披金甲！佢哋嘅叉燒份量十足，而且肥瘦適中，食落啱啱好，唔柴唔膩，食到叉燒嘅油脂香但又唔會過猶不及，唯一差少少就係外皮燒得唔夠焦香，都有可能係健康嘅考慮，但對我嚟講就差少少😢
龍皇披金甲 🍤
龍皇披金甲係另一款明閣必食嘅功夫菜，將蝦膠釀喺龍躉上，一齊攞去炸，食落外皮香脆，龍躉嘅魚油十分之香，估唔到兩樣海鮮咁嘅配搭出到嚟咁好食。每一份仲有蝦頭同蝦尾，可以食埋蝦頭嘅啲蝦膏，而蝦尾肉亦都好紮實，推介！
明閣炸子雞🐓
炸子雞係明閣另一招牌菜，但我哋食完好失望，冇想像中同其他食評講到咁驚艷😢一方面，炸子雞火候太老，雞肉唔夠嫩滑，仲要偏老。另一方面炸子雞嘅外皮應該好香口，散發油脂香，但今次完全冇，淨係食到脆口，但一啲都唔香😢家母直程話海港嘅炸子雞仲好食過佢，真係好失望🫠
金耳榆耳扒菠菜苗🥬
金耳榆耳我哋都係第一次食，後尾查返先發現原來都係啲營養豐富嘅食材，食落幾爽口，配菠菜苗都幾夾，用料幾特別。而菠菜苗非常幼嫩，但味道就正常啦，冇乜太大驚喜啦。
窩燒滋補竹絲雞炒飯 🍛
呢個炒飯都係明閣嘅招牌菜，唔小心叫佢分咗先上，所以冇成個砂鍋上菜時嘅相。用料一樣幾特別，烏雞炒過之後好香，幾好食。因為炒飯係用砂鍋上，所以仲食到少少飯焦，而飯都炒得好乾身，幾好。至於味道方面，呢個炒飯始終都係比較普通，冇一樣嘢特別吸引同驚艷，而且味道好淡，連屋企人食得比較清淡都話冇乜味。
薑汁桃膠燉鮮奶 🥛
呢個薑汁燉奶非常推介，味道好好，燉鮮奶超嫩滑，而且加上桃膠，又多一重口感，雖然細碗咗啲，但都超滿足！
今次係為咗慶祝媽媽嘅生日，所以訂枱嘅時候都有特別留到remark，餐廳另外準備咗一份小甜品，碌柚啫喱紅豆糕，加埋用中文寫嘅生日祝福，即刻加咗分！
計埋開咗一杯酒俾爸爸，成餐飯大概每人$700，比我哋想像中仲要貴，講真唔太滿意，因為幾份招牌菜都冇想像中咁好食，而炸子雞更加係出咗事，所以整體嚟講性價比算係幾低。
另外一個扣分位係職員的專業，食到後尾餐廳都已經空得七七八八，突然間有個負責埋單嘅職員喺我哋身邊行過，聲量唔細咁講咗聲粗口，我哋喺隔離聽到晒但就完全唔知發生咩事（佢係自言自語唔係講比我哋聽嘅）如果呢一間係中低價位嘅中菜，我唔會覺得有任何問題，但呢一間係一間價錢不菲嘅米芝蓮星級食府，職員突然間喺隔離講粗口，好影響成個用餐體驗，而且亦好突兀。服務態度嚟講，就好似好多其他食評一樣，佢哋真係有好大嘅進步空間。
另一方面，作為一間米芝蓮食府，如果上菜嘅時候可以同客人簡單介紹菜式嘅烹調過程同用料，成個用餐體驗亦都會更加圓滿。
總結，唔會encore了🥺😢
Post
