蓮苑 (Closed)

過年前，好多商舖都減價，呢日我哋去咗K11行街，行完就喺度食晚飯啦，突然好想食中菜，於是就揀咗呢間蓮苑試吓。睇咗個Menu，佢自己主打都係食粥粉面飯之類嘅中菜，但同時亦都提供小菜。我哋四個人叫咗三個小菜、乾炒牛河、一個小食。三個小菜分別係時菜帶子蝦球、玫瑰雞半隻、薑汁炒芥蘭，三個小菜我哋都配左螺頭湯。要讚下個湯，上到嚟真係熱辣辣，湯嘅味道非常好非常入味，裏面亦都有好多瘦肉、螺頭和紅棗。時菜帶子蝦球夠新鮮、玫瑰雞啖啖肉、炒芥蘭炒得非常碧綠，菜亦都好幼嫩，好出色，食唔停口。另外乾炒牛河炒得好有鑊氣，亦都唔會好油膩，我覺得都係好出色嘅食物。小食我哋叫咗涼伴海蜇手撕雞，味道都唔錯啊，海蜇好爽口。最後我哋梗係要食埋甜品先走啦，不過可能由於我哋遲去，有啲我哋想食嘅甜品都已經賣晒了。好彩我仲食到我最想食嘅伯爵茶布甸，真係好好味呀，有茶味一啲都唔甜。另外湯圓亦都唔錯，因佢個湯又薑汁味，我好鍾意。