韓閣 (Moved) New Location

早個排食咗好多餐日本嘢，今日就想轉下口味食韓國嘢。講起韓國嘢餐廳，好多人都會即刻諗起尖沙咀嗰條韓國街，但其實只要搜尋一下，每一區都應該會有好嘅韓國餐廳。今日就去咗荃灣路德圍運通街嘅“韓閣“食韓國嘢。本人係韓國炸雞嘅頭號粉絲 ，今次就叫咗三重芝士炸雞 $108，上枱已經見到有唔同嘅芝士鋪滿炸雞上面， 咬一啖，啖啖肉，非常之juicy， 而且有勁多嘅芝士，可以拉絲添，雖然邪惡但係都十分值得。食韓國嘢又點少得部隊鍋 $88 ，呢個部隊鍋性價比十分高。我哋嗌咗小辣， 辣度對我嚟講啱啱好。而且十分足料，有好多牛肉同埋五花腩肉，韓式 年糕口感煙韌彈牙。另外仲嗌咗個泡菜豬肉飯卷 $46， 酸酸辣辣嘅泡菜味十分醒胃，仲有雞蛋同芝士等， 唔好睇佢細細件，但其實都好飽肚 。餐廳嘅頭盤做特價十分抵食，我哋點咗韓國餃子 $15 以及炸野菜春捲 $15。 啱啱炸起熱辣辣上枱， 脆卜卜嘅餃子配入韓國粉絲等餡料 ，別有一番風味 。餐廳雖小但餐牌嘅選擇甚多，而且餐廳仲唔收加一 。見到佢個餐牌有個韓國無骨豬手，賣相十分吸引，下次一定要去試。