君戶鍋貼大王 (Moved) New Location

今日嘅活動結束後，剛剛喺紅磡區散Brand，夜晚晚又有啲餓，就見到呢一間「君戶」，門口有個熟食檔仔，新鮮生煎鍋貼出爐！二話不說就立刻入去坐低，整番一碟鍋貼啦！估唔到竟然有驚喜！除咗新鮮出爐勁加分，鍋貼本身餡多，肉汁仲非常多！食完之後個碟底，都係肉汁；特別一提，五隻鍋貼都只係HKD14，我都好想屋企樓下有一間啊！除咗鍋貼，仲叫咗炸豬扒同一碗豆腐花。首先講下塊炸豬排，係即時點蛋漿即炸嘅，熱辣辣但水準一般，係平時都會食到嘅口味。而豆腐花真係好大碗，滑夠滑，但食落就好似無乜黃豆味道。個人認為，好豆腐花係好難求嘅，要黃豆味重就可能唔夠滑，所以過下口癮嘅貨仔算係咁啦。題外話，食豆腐花個人比較鐘意不停落黃糖。於是我叫侍應加多少少黃糖，無諗過侍應會問我需唔需要換過半碗熱啲嘅豆腐花，因為擔心碗豆腐花唔夠熱啲黃糖唔溶。我真係非常驚訝，無諗到今時今日仲會遇到咁貼心嘅服務，基於唔好浪費，當然婉拒咗，不過諗番起真係難得少見嘅服務態度啊！總結番，經紅磡去尖咀，不妨試下個「生煎鮮肉鍋貼」，好食得泥又夠平，試過就知無介紹錯！係咁！