二宜樓 (Closed)

我講嘅係屯門海翠坊嘅二宜樓～潮州客家菜。喺海翠坊開業嘅食肆，終於試勻晒啦，呢間最遲開業，而我到而家先有機會幫趁。今日係星期五，有下午茶供應﹙星期六日欠奉﹚，大中小點一律7.80，認真底食，我地都係凈叫點心。有花生雞脚﹑墨鱼卷﹑芋蓉粿﹑春菜餃﹑同埋流沙飽。除咗流沙飽，其他都係潮式點心。要講嘅係：墨魚卷～蒸嘅，賣相簡單得嚟又幾受落，一碟四件，好多墨鱼粒在內，清淡好食，又有趙頭。芋蓉粿～煎嘅糯米糍，少少甜，不過要趁熱食，凍咗就煙韌Ｄ。春菜餃～春菜係潮州特產，不過所食倒嘅唔似以前食過果種，但係都幾清爽，配以蝦仁，清清地，可惜外皮掃得太多油，扣咗分。流沙飽～最流沙的一次，食果陣都己經好小心，但係都唧到碗碟都係晒，好彩冇沾污件衫，好失禮。因為試過《潮樓》一役，唔敢抱太大期望，點知呢間冇打正潮菜招牌，反而食倒潮﹑客和廣東點心，所以呢餐都好滿意，加上呢度裝修幾特別，以圓型來設計，外圍二人枱及卡位，燈光柔和，似餐廳或日式餐廳，中間係多人枱，較為光猛，適合一家大細。服務效律唔錯，可惜我地一連幾張枱頭頂都耐唔中有水滴落嚟，可能係冷氣喉嘅問題，領導人真係要跟跟啦。