Fass (Closed)

Item: Fass
Rating: 4
Author: 奧志雷

3.5

55 Reviews

Taste

Decor

Service

Hygiene

Value

770

Tsim Sha Tsui

$101-200

German Western Restaurant Bar

奧志雷

Level4

2.1K

Read full review

再次係我第一個到，最初去左地面既 Biergarden bar，原來餐廳係要落 basement 架，酒吧先係地舖。地牢德國餐廳，即時令我諗起以前係德國既時候，去由二次大戰防空洞改建而成既德國餐廳食飯，十分相似，好有 feel 呢。內籠裝修都非常德國風，不過聖誕裝飾就有點娘啊。

本來環境舒服寧靜又浪漫，不幸地有檯操北方語言既女人連幾個細路嘈到拆天、喧嘩亂叫、高談寬論、鬼殺咁嘈，當左自己屋企咩 ﹗真係大殺風景，將和諧既氣氛完全破壞 ﹗

見到貌似老闆娘的跟佢地坐埋一齊喎，不知是否親戚呢？還是熟客？好采不久就埋單離開，即時回復寧靜，唉。心情平伏後繼續圍顧四週，檯面既聖誕擺設都幾別緻，周遭用上橙色柔和燈光非常溫暖啊。

約左八點，我六點半已到左尖咀喇，都無地方行，七點半先坐低啦，早到半個鐘添！老朋友聚會，飲返杯先，但個個未到，唯有自己隊住先。為左打發時間，唯有不停地將 menu 揭上揭落，先計劃好 order 什麼啦。

去德國餐廳梗係要飲德國啤酒啦，其他酒吧好少有得供應架麻 ﹗我就試試 Helles 啦，味道好香，以前飲過 Kristall 好似有香蕉味，而 Hefe Dunkel 大麥味濃又帶少許甘甘地，不錯。

依家 19:55 分，朋友們仲未有一個出現，見到德國豬手要等 30-45 分鐘，order 定先好喎，佢地黎到就即刻熱辣辣有得食喇 ﹗

德國咸豬手 Pork Knuckle with sauerkraut，一見到碎上我就好怕架喇，會唔會又乾爭爭架？整啖先講，外皮香脆略硬，骨膠原黏住脆皮之下，膠膠黏黏、嚥嚥韌韌，質感非常好 ﹗難得肉質不硬而彈，嚼勁非常。

中程度咸香不嗆不濁，而且仍能保留少許肉汁，都幾滿意 ﹗演釋手法都係較為港式，幸好出品不錯呢，值得一試。德國酸菜醃得非常好，仲好爽口添呢，濕上豬手肉同吃，別有一番風味。薯蓉好香好滑味道濃郁，夾住豬手一齊食超好味 ﹗

暫時係我心目中香港美味豬手排名第 1 位係赤柱 King Ludwig Beerhall，接住係 Biergarden Fass、After 5、德意時，不過最好既豬手當然要飛去德國先食得到啦 ﹗

主角壽星突然遲收工啊，現時 20:30 都仲未到步，我地幾個每人兩三舊已經消滅左隻豬手喇，剩返舊巨形骨頭乍，唯有 order 多隻，又要再等 30 多分鐘喇。

德國腸併盤細 Sausages platter small，多謝 HKD128，大大份物有所值。一早預左香腸會好滯，所以叫細份每人幾舊好喇。其實都分唔開什麼腸呢，有香草白肉腸、脆皮腸、羊肝腸、豬肉腸，全都好 juicy ﹗

肉汁豐富，皮香肉嫩，烤得燋香飄飄，烤香腸既氣味特別芬芳誘人。肉味香濃，肉汁微滲，配埋經加工既芥辣就更加好味。如果配上酸瓜、酸菜又可減低油膩及滯滯感覺，可以食多幾舊啊 ﹗而且酸瓜酸菜都醃得非常好味，不過濃不過嗆，爽脆多汁。

白汁三文魚長通粉，個白汁真係堅正呀，香噴噴又幼滑，味道仲十分濃郁，好好食 ﹗長通粉軟硬適中有趙口，灌入大量白汁再塞入口，感動到震 ﹗全熟三文魚魚味特濃，雖然質感有點乾鞋，還可以。

紅酒炆牛尾，好大碌喎，有肉食 ﹗味道唔錯，鮮茄酸酸的味道隱約散發出紅酒芳香甜味。牛尾炆得非常軟棉，紅酒汁完全滲入每絲纖維之中，每一口都充滿肉汁及醬汁，水潤非常。不過溫度唔夠熱，再熱一點就更好食一點 ﹗

香草蒜蓉辣汁蜆肉扁意粉，如果蜆肉跟意粉一齊炒會更好食，依家蜆還蜆，意粉還意粉，無咩意義。不過居然用上巨形車厘蜆就較為特別，落足本錢 ﹗車厘蜆味道極鮮而帶天然海水咸味，但加埋調味粉就稍咸了一點點。意大利香草扁意粉，香草味突出而霸道，扁意粉嚥嚥韌韌富彈性，不錯不錯。

忌廉白酒煮蜆，同意粉一樣用上巨形鮮車厘蜆，開心死 ﹗跟一般西餐廳完全唔同。可惜係忌廉白酒汁稀如水，水汪汪般。食唔到白酒同忌廉既味道，幸好車厘蜆好新鮮，原味原味，肥美飽滿鮮甜無比 ﹗

燒豬仔骨 baby back rib，非常高質好美味 ﹗肉質軟腍得黎又彈又有咬口，肉質唔會腍劈劈、唔會散筲筲。香濃豬肉香味，外層燒得燋香而裡面嫩滑有肉汁。調味剛剛好，不過濃不過嗆，原汁原味。

德國咸豬手 Pork Knuckle with sauerkraut，第 2 隻豬手喇 ﹗剛才大家一時衝動，四個人都讚成叫多一隻咸豬手，因為壽星遲到而無食過呢 ﹗不過依家食到尾聲，大家都已經飽到食唔落，我又飲左四五杯啤酒，肚都脹晒無位再放食物，唯有就打包返屋企益我阿媽啦 ﹗

嘩，個外賣袋好靚呀 ﹗十足商場名店紙袋咁呢。靚女侍應幫我地影相，又幫我地 pack 好碟豬手，thank you thank you。仲好細心連條骨都另外用盒 pack 埋比我，哈哈。

Cova blueberry cheese cake，突然晏晝收到 mission 要買生日蛋糕，我都係諗住盡人事架乍，唔知尖沙咀邊度有得買。最初諗住去 agnes b 睇睇有無喇，行行下見到 Cova 啊 ﹗

有緣有緣，見到有幾款蛋糕都好靚好吸引，最後決定藍莓芝士蛋糕，又恰巧 Chris 都鍾意食，Happy Birthday ﹗真係好好味呀 ﹗又唔太甜，好香芝士味，口感又滑。藍苺酸酸甜甜好開胃，好好食 ﹗我都忍唔住連食幾塊，哈哈 ﹗大家都飽到食唔落喇 ﹗Happy birthday ﹗食飽飽我又返大埔轉場再飲喇，哈哈。