Mr. Crab by The Captain's House (Closed)

一講起Mr. Crab，大家一家會諗起佢哋嘅美味招牌海鮮袋。而Mr. Crab嘅二人餐除咗依個seafood combo外，仲有小食、主食同兩杯house wine。我個人都幾喜歡食雞翼，所以小食揀咗脆炸雞翼配蒜香蜜糖汁。炸漿唔會厚、薄薄一層包住雞翼，令雞翼皮脆肉嫩。雞翼最正嘅係同絕大部份嘅醬汁都好夾，點上蒜香蜜糖汁，滋味升級。主食有意粉、寬條麵同意大利燴飯三選一，我就揀咗蟹肉蟹膏南瓜意大利燴飯。整碟燴飯蟹味濃郁，每一口都充滿蟹嘅鮮味同南瓜嘅甜味。終於到seafood combo出場喇。11款嘅海鮮，今次揀咗海蝦、小墨魚仔同馬尼拉蜆，再配搭Mr Crab Cajun Sauce。海蝦依舊大隻彈牙、小墨魚仔非常飽滿、馬尼拉蜆相當大隻清甜。配上依個辣辣地嘅醬汁，令海鮮們更加惹味可口。海鮮袋裡面嘅腸仔、粟米同薯仔當然亦都唔可以放過啦。同海鮮們一樣，全部都吸收哂啲醬汁，而且仲帶住海鮮嘅鮮味。套餐包咗兩杯house wine。唔飲酒嘅朋友，亦可以選擇汽水嫁。