深仔記 (Closed)

收工夜咗，返嚟太和先搵食，又攰又餓，離遠見到深仔記個招牌已經比佢深深咁吸咗過去 ，順便叫埋男友陪我宵夜。有咩好得過呢刻有個愛人陪住一齊嘆住呢啲經典味道。淨牛腩，炸雲吞，灼黑柏葉拼魷魚，蠔油雲吞撈粗，腐乳通，加埋凍豆漿。先嚟柱候牛腩，香噴噴立即起筷，牛根又淋又入味，幾乎入口即溶，腩位肉一疏疏，點埋辣油更刺激。灼黑柏葉同魷魚都係爽爽嘅，點埋個辣椒豉油又係經典嘅絕配味道。招牌雲吞撈粗，而撈粗就一定要有蠔油，粗麵表面面積夠大，較易沾上蠔油勁惹味。飲啖熱湯，之後再食足料雲吞，內裏七成位置都係蝦，呢個時候由於佢都沾上咗少少蠔油，試過淨點辣油都夠滋味。腐乳通就不過不失，仲係青綠色 。最後要讚嘅係炸雲吞，將招牌雲吞炸到勁香脆，點上沙律醬，男友口大大可以一啖過。見佢食到津津有味，如果呢刻有支藍妹就不得了，好鐘意呢個。