籽樂廚房 (Closed)

朋友介紹呢邊有間社企餐廳好適合我而家需要調整嘅心情，山林道行冇幾分鐘，就嚟到餐廳樓下～社企餐廳，有部分員工聽覺或者說話能力有不足，但完全冇影響服務質素，甚至可以講比部分餐廳更好。細心位係有個簡單手語介紹，有興趣嘅可以學吓，嘗試用手語同侍應溝通。餐湯配蒜蓉包 - 有薑味嘅南瓜湯，啱晒鍾意薑味嘅我，好特別。蒜蓉包熱辣辣，鬆軟得來淡淡香蒜，口感味道一流。巴馬火腿伴蜜瓜田園沙律配無花果黑醋汁 - Parma Ham 油脂不多，味道濃郁，沙律用料新鮮，無花果黑醋酸中帶甜，整個配搭唔錯。芝士煙肉焗蠔 - 芝士厚厚蓋住，咸咸地嘅芝士同鮮蠔好夾。黑松露野菌意大利飯 - 濃濃黑松露同野菌汁好均勻，淡淡野菌同黑松露味，而且我覺得餐廳配合左香港人口味，無真正意大利飯咁硬。即磨咖啡 - 有淡淡果香味，證明咖啡豆選材不俗。Brownies - 濃濃朱古力味，每一口都有果仁。坐坐下，有對情侶入座，冇幾耐，又有一班知己朋友聚會，呢度真係一個美味同深層意義嘅地方。