蘭桂坊車仔麵 (Closed)

今日同個同事，埋頭幫客人個app做 debug，做到5點幾都未食野， 個同事見肚餓，叫我一齊出去搵食。由於我約左班舊同事放工落蘭桂坊Happy Hour，所以我提議過老蘭食日本拉麵。一到老蘭，我地比一間藍色字招牌嘅鋪頭吸引。當然轉plan B 食車仔麵。 入面裝修幾簡潔，不過最正係四面牆都裝曬 USB 頭，連power supply 都有，捧埋部laptop黎做presentation都ok喎，哈哈。落單都係用剔剔紙，價錢由 1 餸 36 蚊到 5 餸 64 蚊，唔算太平，不過一定平過日本拉麵。都係要自選麵，湯底，配料。我剔咗5餸幼麵，另加椒鹽雞軟骨同埋Coke Zero，同事就要咗3餸菠菜麵，椒鹽燒賣同埋柚子茶。柚子茶原來唔係杯上，係膠樽上，同事話太細樽，唔夠喉，唔太甜，幾好飲。椒鹽燒賣皮唔夠脆，有點韌，比較失色。椒鹽雞軟骨幾脆口，味道都好正路，不過肥咗少少。我碗5餸麵送到面前，發覺店家都幾認真，連公雞碗都係自家出品。幼麵都算爽口，豬皮有咬口，豬肚豬腸乾淨無豬味，素鮑片有點韌，最正係牛腩，夠味夠爽。同事果菠菜麵，佢話菠菜麵好好味，不過甜酸齋太油膩，鮮腐竹好味，豬紅無豬味，唔會一夾就散