德美壽司

Open Now

Now Closed

平日好少去沙田，嫌佢人太多，啲食肆又貴又排長龍又唔好食 但原來都有例外嘅！德美位於沙田某屋苑入面，地點唔多方便，好彩屋企有巴士直達 。營業時間由正午開始，星期六11:45 去到已經排長龍，我哋一行五人，好彩最後都入到，否則就要等到下午一點後至入得。因為一早出發，所以冇食早餐，入到店內已經好肚餓，再睇埋個餐牌真係頂唔順喇！德美嘅午市套餐性價比高，我哋揀咗烏冬壽司套餐、魚生飯、天婦羅套餐、壽司套餐、刺身套餐。魚生非常新鮮，肉質結實又彈牙，品質同高檔日本料理店無異，好難想像如此高質嘅魚生竟然隱藏响屋苑入面 魚生新鮮，壽司就冇得輸喇！基本上就算唔醮醬油都得天婦羅即叫即炸，保證熱辣辣，粉漿好薄，食多幾件都唔覺膩 牛肉烏冬用清湯做底，牛肉嘅鮮味令湯底更濃郁。食咗咁多生冷嘢，臨尾食碗熱烏冬真係非常暖胃又舒暢！不得不提，套餐入面嘅茶碗蒸，用上湯蒸蛋，係我食過最好味、最滑溜嘅蒸蛋！山長水遠？No No No 為咗德美，幾遠都嚟啦！