炻板燒 (Moved) New Location

屯門少有既日式鐵板燒餐廳，價錢唔算貴，物超所值。餐廳貼滿抗爭海報，天花板垂掛左好多打氣願望牌。全日鐵板燒套餐有多款牛既部位可以選擇，例如封門柳、和牛、牛小排、吉列牛板腱等。除左鐵板燒，亦有其他小食、芝士丼、咖哩丼、鰻魚丼，及稻庭烏冬。叫左板燒封門柳套餐($188)，包括有封門柳、麵豉湯、白飯及飲品，椒鹽蟹子軟殼蟹($78)。封門柳非常厚身，因為係牛既橫隔膜肌肉，所以油花比其他部位少，肉味更淳厚濃郁。店員先以牛脂肪抹勻鐵板爐，之後就可以自己燒肉。爐溫充足，一放上肉片就滋滋作響，每面燒幾秒，已經聞到肉香，趁未完全熟透時立即品嚐，質感比較腍，彷彿入口即溶。將肉片沾點餐廳自製既醬汁，帶點甜甜既味道，別有一番風味，亦可搭配白飯，入面混入左芝麻及紫菜，特別香口。麵豉湯用料豐富，加入左大量昆布，味道適宜。兩隻軟殼蟹炸得極之鬆脆，外層蘸上大量蟹子，有咬口之餘，亦減去油膩感。椒鹽味唔會太嗆，襯托出蟹肉獨有既味道。中間竟然仲有蟹膏，非常滋味。整體，難得可以食到豐富既燒肉套餐。肉質好，油脂香濃，而且做緊優惠。