堂記腸粉專門店 (Closed)

佐敦之行其中一站就係黎呢到食腸粉，間野叫得自己做腸粉專門店，應該有返咁上下，所以一路都有興趣黎試下。坐底既時候，阿姐話腸粉要等二十分鐘，今日有時間，等下又無妨。要左兩款腸粉，豬潤蝦米同埋魚片叉燒，同埋都試左佢既粥。粥係唔洗等，等腸粉既時候，食粥剛好，鴨腎菜乾豬骨粥，好大舊豬骨，個粥好屋企既感覺。不過要等上二十分鐘，要埋另一款粥試下，就係豬骨花生粥，水準也不遜。二十多分鐘，終於有得食。腸粉睇落見到餡，明顯做得夠薄，食落亦夠滑，很好。雖然做得薄，不過都無穿餡，真係要讚。餡料方面，豬潤食落幾爽，亦幾大舊下，配上蝦米，個味幾夾。另一款係魚片叉燒，魚片幾清淡，鮮甜算不上，不過幾滑下，加埋腸粉真係滑上加滑，叉燒切粒做餡，不算太特別。呢到d腸粉真係做得唔錯，幾架勢下，功夫野係香港買少見少，行開行埋有時間真係要支持下。係路邊食，車唔算太多，環境可以接受的。服務唔係要求太多應該都唔係太大問題。黎幫襯既應該係要考慮自己有冇時間，等應該都無可避免，走既時候full house，聽到阿姐講腸粉要等四十分鐘，唔係誇張。