周記油渣麵 (Closed)

幾個月無嚟深水埗，行過好多人排隊的文記車仔麵，周記原來裝修間開咗兩間舖，同一名字一邊堂食麵同滷水，一邊食近似兩餸飯，而廚房亦由門口位搬到最入。一改以住「地踎」的裝修，以前我只會外賣，宜家企理整齊咁多，一定係堂食啦。好多人見到店名，只叫油渣麵，其實咁多年，我始終覺得「炸北京餃麵」才是招牌菜。周記的麵底係用粗粗的上海麵，即係上海粗炒的麵質，吸湯而有咬口，係其他麵店比較少見，湯麵一定要加旁邊嘅冬菜，食開重口味的話，可以加多少少。到主角，炸北京餃，餡料眼見有豬肉雲耳馬蹄，比較爽口，一上抬，熱辣辣，明顯係即叫即炸，外皮係比較厚嘅餃子皮，食落好香脆，加埋個辣醬，同炸餃子配合得好好，個人覺得可以俾多少少辣醬，食得再過癮啲。