臨記車仔麵 (Closed)

一直都好掛住臨記既車仔麵，今日有緣黎藍田，怎能錯過見你一面。今次黎唔使大排長龍，落單拎野食都快左好多～繼續我既自選之路。兩個人叫左$150 蚊，都好夠飽。今次繼續叫我最愛既傳統湯，不過店員有問我加唔加腩汁/沙嗲汁，加左腩汁既湯底夠濃夠正，配烏冬都好夠味。牛筋係我一直都念念不忘，佢係我食過最喜愛既牛筋，夠腍夠入味勁重膠質，無牙婆都食到。溏心蛋有拉麵店水準，食落非常軟滑同流心。鮮竹卷自家製，勁多饀好好食。今次試埋個鮮腐竹，索曬湯汁唔錯。朋友就叫左無加腩汁，湯底清好多。試左舊魚腐，唔知點解覺得有陣蠔豉味，唔知係咪個花菇既影響，好搞鬼。花菇蠔油味幾濃同入晒味，之後食番舊蘿白，份外爽甜。最後試埋個瑞士花香雞翼，果然食到淡淡桂花既香味，甜甜的配雞翼又幾有新鮮感，呢餐都算幾滿足。