大鼻滷 (沙咀道) (Closed)

做完野去附近搵食，見到呢間叫大鼻滷嘅粉麵店，個名咁得意就試下佢先。店內好旺坐滿客，好彩最入仲有張枱唔使等位啫，坐低後店員送上熱水。睇下餐牌叫咩先，除咗粉麵，仲有得叫飯喎，早餐同下午茶時段仲可以加一蚊就有冷熱飲品，嘩，抵喎！咁熱天，叫返杯凍檸茶走甜先，唔知係咪茶底熱呢？有杯冰另上，正呀。一般叫走甜黎到杯飲品都係唔凍嘅，我估係無預備無糖嘅茶底啦。呢度自動比多杯冰太好了，講返杯檸茶，茶味都唔錯，仲有四片檸檬夠香口。叫左碗麵加碟菜，有肉有菜係咪健康啲先？哈哈，自我感覺良好。都幾大碗喎，多湯正。本來叫個崩沙腩麵，店員推介佢哋個雲吞同魚蛋都自家製有保證，橫掂咁肚餓叫豐富啲都好合理吖。碟菜都好大碟，咁樣都係加七蚊咋，抵食！通菜爽口唔老身，腐乳醬鹹香微辣，正。崩沙腩好得，入口鹹香鮮味，軟腍得黎筋位又有咬口，少少脂肪位更甘香，好味好味。試埋店員推介嘅雲吞同魚蛋，無失望喎，雲吞鮮蝦大大隻夠爽口，肉鮮味，食得出新鮮包起。魚蛋彈牙唔腥，真係好食喎。湯底無乜驚喜，但飲左大半碗都無口渴，應該係無添加啦。麵爽口無鹼水味，好食。又平又好味，唔怪得咁多人啦！