巧得鍋 (Closed)

搞咩午餐食雞煲…今日有事出觀塘，午餐朋友話要食雞煲，我:”?”，大佬玩嘢咩…搵搵吓原來真係有一間有得食，仲要幾平。觀塘成運大廈嘅”巧得鍋”，係呢頭嘅名店。我之前食過晚餐，唔知原來午餐有雞煲食，而且佢方便嘅地方係二人set。二人set可以揀雞煲，或另外兩種牛煲。連沙律、白飯同菜，都只係HKD 178，已經夠二人食。雞煲可以揀辣度，我哋揀咗BB辣。咩叫BB辣呢？就係我食完唔會流鼻水嘅😂。佢個雞煲係有麻辣嘅麻香味，所以個醬本來已經好夠味。雞嘅份量好多，如果正常連白飯食未必食得晒。同埋佢係擺喺個爐度坐住，所以一路食一路傾偈再炒下個雞，都唔會凍晒，幾啱同朋友嚟。佢個菜係有分蒜蓉同上湯，我哋揀咗蒜蓉，正正常常啦，不過真係好大碟。另外佢係有啲特別飲品，我哋叫咗白桃茶同百香果茶，個人都係鍾意白桃茶多啲，不過會有啲甜。結果飽到頂住，落樓200，地方闊落，冷氣足夠，坐得舒適。有時食呢啲，好過食逼逼打卡餐廳啦…