My Ahjussi (Closed)

今晚同男朋友黎到一間佈滿花花裝飾既韓國餐廳食晚飯，打卡一流。首先送上一碟前菜。泡菜新豬肉豆腐鍋好足料，勁多豆腐、新豬肉同泡菜，幾辣架。叫呢個係好奇想試下新豬肉係咩味，估唔到新豬肉食落無論味道定口感都同普通豬肉無異，好有驚喜。韓式便當配炸雞除左有白飯，仲有甘筍絲、青瓜絲、粟米粒、雜菌、太陽蛋、拌飯醬，色彩豐富。炸雞有三件，揀左韓式甜辣味，雖然辣，但十分惹味，而且食落啖啖肉，肉質嫩滑唔鞋口，好味。韓式泡菜牛肉薄餅未食過呢種配搭既pizza，都幾夾。重點係pizza食落好煙韌，唔會硬掘掘，好好食。飲品一杯叫左Secret Menu既士多啤梨奶(跟餐加$25)同一杯凍泡沫朱古力(跟餐加$20)。士多啤梨奶有球士多啤梨雪糕，當佢融化係士多啤梨奶到就變身成為士多啤梨奶昔，正。凍泡沫朱古力唔太甜，賣相都唔錯。