不要對我尖叫，日常茶間， (利舞臺廣場) (Closed)

不要對我尖叫係開左係香港都好似有兩年，但一直都冇機會試，佢嘅分店係中環銅鑼灣呢啲唔太方便屯門人嘅地方，所以都冇特登去試過。意外地發現佢竟然係storellet嘅會員，迎新有得揀第二杯半價，係真係幾抵，但加配料就另計。要左桂花烏龍(中)($22+)有少少桂花係底，烏龍味加桂花嘅組合好清新，要左半糖就咁飲係啱啱好。反而佢嘅奶蓋有啲令人失望，唔加好過加，飲落好明顯嘅奶粉味，搞得唔算均，所以飲落會有奶粉粒。奶蓋芝士味唔出，入口口感太肥膩。飲到尾有啲飽。另一杯要左四季春茶($18+地瓜芋圓+$6)，同平時飲嘅四季茶隻味有啲唔同，草青味更加明顯。芋圓同地瓜圓反而幾好食，有咬口唔會太大粒，芋頭味比地瓜味出。