龍城冰室

Open Now

Now Closed

近幾年香港真係開咗唔少比一般茶記企理嘅冰室。呢次行過見到午市都有得鋸扒，決定一試！扒類款式幾多，連較少有嘅羊架都有，雜扒亦有好幾款。我哋女仔想豪得嚟又冇咁大脂肪債，所以揀咗eye-catching得嚟又「少肥」啲嘅龍蝦雜扒。鐵扒唔係真係話超級大，一個人食會較飽，但都係食得落嘅程度。menu老實咁寫明係半隻龍蝦，但廚師擺得靚靚，影相打卡依然壯觀。肉幾爽口而且唔腥。廚師喺唔破壞龍蝦外觀嘅情況下鎅開外殼，一把刀，一隻叉，鉗位大大嚿肉輕易取得！龍蝦當然係主角，但其他海鮮都好吸引~所有海鮮都唔腥，不過可能鐵板餘溫嘅問題，影完一輪相，啲肉已經唔太juicy。魚扒沾蛋漿煎過幾香，幾上汁。鐵板可以跟飯/意粉/薯菜。見到焗薯個皮洗得咁乾淨就好放心連皮食，上面嘅沙律醬唔似平時食嗰種，冇咁漏，幾好食~餐湯揀羅宋湯，幾香幾濃，有牛尾味。安慰住自己個鐵板係同人share，好放肆咁叫咗杯紅豆冰。用黑白淡奶沖當然係信心嘅保證。紅豆夠腍，唔太甜，紅豆唔算大粒，係典型茶記嘅取向。呢間茶記價錢幾實惠，普通常餐嗰啲都係四五十蚊有湯有飲品，可以話係銅鑼灣恩物。