Catee (Closed)

荃灣除咗大商場之外仲有好多好食嘅小店，今次嚟咗楊屋道依間餐廳係以貓為主題，相信唔少愛貓之人都會鍾意。今次我哋叫咗兩個套餐，其中一個係紐西蘭肉眼扒($268)，另一個係墨魚咀墨汁燴意大利麵($158+套餐$30)，仲加多咗個水牛城雞中翼($88)，飲品方面就叫咗凍朱古力。套餐包括麵包、餐湯、飲品同沙律。餐湯係蘑菇湯，雖然唔係好杰但係飲得蘑菇嘅香味同埋雞湯味，至於沙律就好多鴨胸，非常足料。但套餐入邊最值得稱讚嘅係杯凍朱古力，有別於坊間一般用朱古力粉沖。因為佢入邊仲加多左忌廉飲落去感覺稠密，有種喺飲品專門店飲朱古力嘅感覺 。水牛城雞翼就做到外脆內軟，入邊好多汁，而且個辣度啱啱好，如果唔夠辣可以自己加Tabasco。牛扒叫咗五成熟，熟度啱啱好，食落去肉嫩多汁，而且配菜有薯蓉、椰菜、紅菜頭、蘑菇，份量多到可以兩個人分享。但對比牛扒，墨魚汁意粉更加出色，因為除咗份量多之外，佢嘅墨魚咀好有咬口，意粉彈牙仲帶有蒜味，即使食得比較慢，意粉都唔會太乾，能夠保持住濕潤嘅狀態。最後以一個香濃柔滑Tiramisu作為今次結尾，十分滿足。