Olive Cafe (新領域廣場) (Closed)

今晚陪細妹去荃灣鼓房練鼓，練完當然要揾地方醫肚，荃灣真係大把餐廳揀，經過新領域我哋就揀咗呢間裝修幾靚嘅西餐廳。德國鹹豬手配酸椰菜 （$168）份量好大，已切好咗嘅鹹豬手方便客人食用，豬手烤到外脆內軟，食落唔會太膩，風味十足，性價比超高！手打牛漢堡包配黑松露醬薯條（$108）漢堡肉汁豐富又香濃，肉質偏厚實，夾係中間嘅生菜同蕃茄幾新鮮。配菜係粗身扁薯條，炸到外脆內熱，配埋黑松露醬同茄汁，粗薯雖然易飽但每啖都好滿足！特式小食拼盤（$108）洋蔥圈、吉列蝦、魷魚鬚、雞翼、薯條、紫芋粟子薯餅，選擇超豐富，值得一讚嘅係小食都係新鮮炸起！個人最推薦魷魚鬚，火侯啱啱好，鬆脆惹味，食到停唔到口！少女之夢（$32）粉紅色特飲其實係玫瑰士多啤梨smoothie，入口清新酸甜，主要係士多啤梨同奶香同淡淡玫瑰香。OLIVE 水果茶（$48）水果全部切到細細粒可以一路飲一路用匙羹𢳂嚟食，飲落好清爽，果味濃郁，夏天必點！