Olive Cafe (新領域廣場) (Closed)

朋友在荃灣返工，佢話好耐無食牛，想食牛扒，佢話呢間餐廳係幾好，所以就揀左呢間食飯。餐廳地方唔大唔細，環境幾好，暗暗地，有氣氛，坐得舒服，傾計食飯最好不過。呢度menu選擇都多，價錢又唔貴，叫一個餐，沙律同餐湯都無限添加，我哋就叫左石燒牛同埋pizza。餐湯係羅宋湯，配料鐘意食幾多都得，味道酸酸地，開胃，都幾好飲。沙律菜用盒裝住，好乾淨，醬汁可以揀麻醬同埋醋，食落爽口。朋友叫左個石燒之選，美國極級肉眼扒200g。黎嘅時候扒只係得三成熟，想食幾熟就自己決定。肉眼扒厚身，肥瘦均勻，多肉汁，入口軟熟，唔會硬掘掘，底仲有洋蔥。扒係無加調味料醃製過嘅，原汁原味，加少少鹽食已經唔錯，朋友超讚。食肉獸pizza係薄批，上枱熱辣辣，裡面有莎樂美腸，腸仔，火腿同埋煙肉，咬落去啖啖肉，雖然配料大多數係鹹，但味道都唔會鹹得過份，幾好食。