盈福小廚 (Closed)

姨媽們約好週六下午落銅鑼灣濕平，大姨丈就提議早少少喺附近間佢覺得唔錯o既「盈福小廚」度食小菜作晏，仲預埋小肥兩兄弟份添。餐店o既竹架門面至樑上o既燈籠吊飾，四周o既裝備都極富中國色彩。門外展出多頁餐牌及彩圖推介項目供食客參閱。姨丈一早訂咗張大枱，一行九人一到步即有位坐。經理哥哥非常落力好客，埋位開茶時亦不忘介紹超值o既八人及十人午市套餐。長輩應推介點咗個十人小菜套餐，$968包有無添加老火靚湯、原隻盈福招牌瑤柱浸雞、自選八款指定小菜、白飯及甜品，單睇價格已覺抵。此外，仲加點咗幾款前菜小食黎分。香橙鮮准山（$45）：橙味准山前菜清新開胃，配搭新穎討好。金磚脆豆腐（$48）：炸至金黃o既豆腐粒外脆內嫩滑，簡單伴上炸蒜粒已夠惹味。雞絲拌粉皮（$48）：雞絲粉皮香潤甜美，同樣味佳。十人小菜套餐之無添加老火靚湯：老火湯足料火喉夠，清甜濃郁且不油膩，大家都覺得好有驚喜。十人小菜套餐之家鄉欖豉骨：欖豉骨香口帶甜。十人小菜套餐之香煎蚵仔蛋：蛋蛋煎得夠乾巧，入面o既蚵仔更加係肥嘟嘟、滑lut lut，掂呀！十人小菜套餐之菜芯炒手切牛肉：鮮綠色o既菜芯咬落真係好卜卜脆，手切牛肉亦炒得好軟腍，家常小菜確真好