King's & Queen's 冰室 (Closed)

星期六放假，成班朋友入左西沙一個朋友屋企玩，晚餐揀左附近既King's & Queen's 冰室，位於馬鞍山西沙公路533號泥涌村地下。餐廳環境寬敞，座位鬆動舒適，店員親切又友善，晚飯時間，接近全場滿座，好多街坊客捧場!金牌紅燒乳鴿外酥內嫩，醃得入味，食落肉味香濃，口感細嫩。黃金蝦球炸至金黃香脆，蛋黃粒鹹香十足，蝦球啖啖肉惹味又甘香。黑松露醬滑蛋雜菌新鮮爽脆，炒蛋滑嫩濕潤，加入味道香濃獨特黑松露醬同炒，特別惹味!菠蘿咕嚕肉酸酸甜甜好開胃，外焦香內嫩滑，佐飯一流。鐵板芝士龍利柳龍利柳魚肉爽滑鮮美，用鐵板上有助保持熱度，加以咸香拉絲芝士，食落啖啖肉勁JUICY。蜆蚧薑蔥牛肉牛肉嫩滑充滿肉汁，加以鮮香惹味蜆蚧、薑蔥同炒，更能提出牛肉鮮香。蝦醬通菜鮮魷炒得好有鑊氣，蝦醬味道濃郁鮮香，通菜新鮮翠綠，魷魚Q彈有嚼勁。粟米魚肚羹蛋花賣相吸引，湯頭濃稠度剛好，加入鮮甜粟米、爽滑彈牙魚肚，增添口感。