陶源酒家 (Closed)

拆禮日加紅日，巨盒附近時見有動漫穿戴之靚仔靚女周街行，可能覓食，估計依佢哋造型唔會去品茶啩，又，橫掂大部分酒樓都唔會有特價點心各樣，索性揀間所有俾分位都中上嘅酒家，例如陶源。早上11點到，接近一整年冇幫襯，果然都維持到狀態。裝修係有啲顯舊，不過依然keep得地方乾淨。乳鴿皮脆肉嫩，窩心哋按人數奉上相應透明手套。咬開時油份肉汁緩緩滲出，難得冇其他地方嘅乳鴿咁鹹，如果鍾意偏淡味，連淮鹽都可慳番，更原汁原味，價錢$38隻算相宜，唔怪得旁邊幾枱客都嗌。別有洞天鴛鴦腸，質感係米網卷，黑色那邊估計用墨魚汁做成腸粉皮，內裡卷住剁碎豬肉、菇菌，白色那邊內裡係鮮蝦，中間縛住3條韮菜花做裝飾。食過幾間酒樓整嘅太極鴛鴦飯，最重料、多汁係呢間，白汁嗰邊用左剝殼新鮮蝦，冇乜雪味，紅白兩邊啲汁都夠包哂啲飯，所以口感會似食意大利飯。鴛鴦香煎臘腸卷（咁啱今次嗌三味餸都「鴛鴦」），唔止臘腸，仲有膶腸、芋頭切條，膶腸味搶過臘腸，油香帶甘，包同芋頭又吸收咗啲臘味味，包亦甘甜。雖然每枱冇保溫壺熱水，不過茶壺開蓋，待應五分鐘就會嚟加水。