老鳳冰室 (Closed)

今日晏晝同同事去老鳳食飯，第一次認識老鳳係喺深水埗，果次（幾年前）食完已經覺得好印象深刻。無論係內部裝修（十分有昔日香港情懷），或者係食物選擇或質素，都令人想一再光臨。葵芳哩間我都嚟過好幾次，內部裝修及擺設好特別同好用心，好友舊日香港嘅感覺，牆上邊仲掛住一隻大金鳳同一架大火車，亦寫有會令人會心微笑嘅金句。每次入到餐廳，都好似去咗另一個時空一樣，會令人不禁周圍望，去欣賞佢嘅獨特設計。至於食物，老鳳每次嘅質素都好高好穩定，試過好多款唔同嘅小食（例如：黑松露滑蛋多士、蜜焦雞翼、肉醬焗薯泥等）同主食（芝士牛肉濃茄湯通、韓式炸雞芝士保齡球等），大部份都好好食，用料份量十足，絕對係一間好有誠意，食物質素對得住價錢嘅高汁茶餐廳！而今日，我就叫咗咖哩滑蛋豬頸肉飯，佢嘅咖哩汁真係好出色，咖哩味好香好濃同帶有淡淡嘅香辣味同甜味，送飯真係一流、好開胃！滑蛋炒得好靚同真係滑嘅，蛋味好香，炒嘅時間控制得啱啱好，唔會太水汪汪或太硬。豬頸肉都好食，肉質彈牙而唔硬，肉味好香，掂呀！好滿足的一個午餐，好好咁為下晝嘅工作叉足電。但我覺得環境可能要留意一吓，餐廳內間唔中會有陣陣坑渠味，特別係近洗碗嗰一邊⋯⋯