有蒸氣 海鮮石鍋專門店 (Closed)

蒸氣火鍋喺香港都興左好耐，不過食嘅機會一直都唔多，今晚朋友話想食，最後我哋揀咗喺op都好多好評嘅有蒸氣。入到鋪頭，就見到幅貼左好多明星相既牆，睇嚟店家同娛樂圈都有返一定交情。上一層就係食嘢嘅地方，望落去每個位置都好寬敞同埋乾淨，坐落亦都好舒適。第一次黎，我地揀左最基本既套餐，$328有6款海鮮、2款丸、同一款菜，好抵食喔！一開始，侍應叫我地揀咗要粥底定湯底先，佢都好多選擇同配搭，最後我哋揀咗南瓜雞件粥底，之後侍應就放左d材料係煲底，跟住上面加個蓋就開始食我地既主菜 — 蒸海鮮 啦。沙包蜆、海中蝦d蜆唔算好大隻，但一食落口就食到海水既鹽味，好鮮。至於海中蝦，比想像中大隻好多，食落啖啖肉，好味。鮑魚鮑魚上面加咗啲蟲草花來蒸，鮑魚咬落去好彈牙，亦都好鮮味，而蟲草花更加為鮑魚加添左啲層次。元貝元貝上面加咗啲粉絲同辣椒蓉去蒸，元貝本身就好鮮味，加上嗰兩種配料，成個口感同味道都配合得好出色。桶蠔呢隻桶蠔唔講得少，真係好大隻，加上蒸既時間啱啱好，做落好juice。另外，套餐入面既鮮魷、豬肉丸、墨魚丸同埋勝瓜都好好食，食完咁多野，最後仲可以食埋充滿住海鮮鮮味嘅南瓜粥，真係食到捧住個肚走。