Primo (Closed)

同朋友放工約食飯，見附近有一間餐廳返氣氛唔錯，所以就入咗去試吓啦。我地叫左一個經典瑪格麗特薄餅，素香腸意式蔬菜汁意大利麵，泡沫咖啡幕斯蛋糕，焦糖新地。個薄餅好有驚喜，我哋叫咗普通嘅薄餅底，但係都唔厚，而且煙煙韌韌，上面嘅topping有蕃茄，加埋芝士，羅勒葉同埋檸檬香草，呢個經典嘅組合真係冇得頂。我朋友比較鍾意個意粉，平時喺餐廳食嘅意粉都會比較漏，但係呢個意粉加咗生洋蔥同埋蒜片，所以一齊食嘅時候，生洋蔥嘅辣味會中和左醬汁嘅膩，最特別嘅係素肉，咬落去味道同口感都幾似肉味，不過唯一嘅分別就係去到後勁嘅時候唔會有肉嘅羶味，反而會有好濃醬汁味道。個咖啡蛋糕，用嚟打卡一流，用咗唔同嘅生果來做擺設。蛋糕分三層，最底嗰層係咖啡味嘅脆脆底，中間係咖啡味布甸，上層係奶凍，加埋隔離嘅雪糕球，又有雪糕嘅香甜味，又有咖啡嘅香醇味，真係好吸引。至於焦糖新地，有三球雲呢拿雪糕，十分足料，加上表面淋上滿滿嘅焦糖同埋花生，食落有口感，為今餐畫上左一個完美嘅句號。