麵麵店 (Closed)

原本想去食車品品，但因為門口嘅人龍而卻步，因而轉投不遠處新開嘅麵麵店。受到明星效應嘅影響，對呢間小食店嘅食物質素滿心期待。八點幾去到，已經即刻有位坐。裝修有別於一般嘅車仔麵店，環境尚算舒適，唔會太逼。order咗一碗車仔麵，麵要咗讚岐烏冬，餸要咗豬爽肉、鹵水雞亦、牛柏葉同山根。湯底好鹹，烏冬分量好少，除咗雞亦鹵得尚算入味之外，無咩特別。仲order咗一碗生菜魚肉，等咗成半個鐘先有得食，除左魚肉尚算彈牙之外，又係一碗非常非常普通之作，仲要催咗兩次先上！飲品方面叫咗一杯杞子菊花蜜，可以講係普通菊花茶一杯！每一張檯都會有一盅辣菜脯，好重蒜味，好辣，但相比之下，車品品嘅辣菜脯真係好食好多。服務方面，真係好唔得。除左人手嚴重唔夠，成間鋪頭得三個侍應之外，幫我地落單個阿姐落單速度好慢，要不斷慢慢重覆俾佢聽，最尾仲要落漏單！！！作為一間車仔麵店，上菜速度極慢，仲要催咗幾次先上齊，真係唔會再幫襯呢間。