蠔門宴 (Closed)

一入到餐廳就聽到一啲水滴音樂，好特別既背景音樂，而且同餐廳既裝潢好襯。首先係日本珍珠蠔，果真最甜， 甜到連支 resling 都即刻冇咁甜，回甘就係無乜架喇，係食佢頭一浸囉。Scottish rock 鹹得黎甜故喎，係一隻平衡於海水同甜美之間既生蠔。Gillardeau 金屬味重好多，配以淡淡既海水味，回甘複雜，不愧為 Gillardeau。綠翡翠有輕微煙燻味，我諗如果有杯威士忌喺度應該會幾襯。食生蠔呢一個環節臨尾都忍唔住加多隻小町，手掌咁大唔在講，蠔身滑溜 creamy，食左幾啖都仲未食得哂啊。食完生既當然要試埋啲熟既啦，分別嗌左煙燻蠔同埋吉烈蠔，煙燻蠔既煙燻味相當濃郁，邊位燻到好有咬口，連埋車厘茄同青瓜一齊食，倍覺清新，吉烈蠔炸得酥脆，廚師火侯控制得好好好，入面仲好 juicy 架。最尾黎個蠔飯增添飽足感，蠔身飽滿，個飯啲豉油甜甜地，滿足。