一番風味 (Closed)

老公轉左去灣仔返工後，兩公婆好多時都會去灣仔食晚飯後才回家，兩個人返去煮又麻煩，又要買又要整，其實同外出食飯價錢又不會差太遠。今次見openrice有幾多好評，所以試下這間一番風味。離灣仔站5分鐘路程，不算太遠，餐廳地方都幾大，乾淨企理。店內有多張以前香港的相片。啫啫通菜煲有蝦米、瑤柱、肉碎及薑爆香後，加上咸蝦醬一起炒通菜，通菜爽脆，有咸鮮香味，非常惹味但比較咸，送白飯就一流。黃金蝦色澤呈金黃色，外層包滿著咸蛋黃，香味十足，蝦肉新鮮爽口，蝦殻炸得香脆，口腔內充滿啖啖蝦肉及咸蛋香，而且一碟有八隻，兩個人夠食有餘。膏蟹粥蟹粥非常大煲，一鍋約有四人份量，共有一隻膏蟹，蟹粥呈黃色，還有少許米粒狀，每啖粥都充滿蟹膏，鮮甜無比，而且完全無落味精，食完返到屋企都唔覺口渴。總括而言，蟹粥鮮味十足，是必食之一，同老公兩個人一人食左三碗，飽到上心口。