籠太子點心專門店 (Closed)

東大街嘅籠太子之前食過覺得抵食，今晚再嚟幫襯，坐低叫咗佢哋嘅蝦餃同燒賣，可以嗌兩隻一籠，份量啱啱好，二個人分，唔怕食太多，蝦肉彈牙夠新鮮。上湯鮮竹卷連湯上枱，鮮竹好吸味，索晒個湯汁，非常好味。不是炸兩，腸粉皮包住炸脆及蝦肉，落咗豉油入口仲好鬆脆。名醬善蒸鳳爪，非常入味，薦底嘅瀨粉，索咗汁都好入味。蒜蓉排骨，勁多蒜蓉，仲有少少薑同乾蔥，所以好惹味！雪山叉燒包，外皮非常之鬆軟，加埋叉燒，甜甜鹹鹹組合幾特別。最後叫咗個糯米雞，份量非常之大，裏面嘅雞都係好滑，而且仲有粒鵪鶉蛋，兩人差啲都食唔晒。整體味道不錯，價錢公道，埋單$180算唔錯，街坊嘅價錢，點心都係即叫即蒸，調味剛剛好，點心算各有特色。仲可以加埋自家特製嘅辣椒油，混入炸過的蝦米及蝦乾，唔算太辣，辣味點到即止。