赤橋拉麵 (Closed)

一直有聽聞過赤橋拉麵，響新界西幾出名下，地位拍得住元朗嘅「彩」。可惜紅橋呢個位置有少少唔方便，於是一直無機會去試。呢次星期六晚大概八點去到，雖然只係一個人去食，但係都排咗大約35分鐘隊，大概有10個人等緊。由於舖頭非常細，只有十多個位置嘅關係，所以大家去得就預咗要等一段時間。麵嘅湯底只有魚介、黑油同海老三款，但係全部可以揀湯麵或者沾麵。由於本人係蝦湯控嘅關係，諗都唔洗諗就揀咗海老沾麵（$85），另外加三隻餃子（$15）。麵本身比較硬身，沾麵嚟講硬度係控制得幾好，麵亦都掛湯。至於湯底，可能因為食呢間嘅前兩日食咗北海道嚟嘅一幻，所以相比之下就略嫌失色了。呢間嘅湯底鹹咗少少，而且欠缺咗蝦湯應有嘅香味，即係蝦油嗰種令人垂涎欲滴嘅味道，只有軀殼而無靈魂。至於餃子，表現亦平平，煎得唔夠脆，上台時候已經淋咗，餡料就係豬肉加菜，正常餡料，但唔會令人有想encore嘅衝動。總括嚟講，如果住響屯門元朗天水圍嘅朋友，想食間唔錯嘅拉麵，呢度的確係選擇。但如果要山長水遠特登入嚟而且仲要排咁耐隊嘅話，就絕對唔值得了。