中哥廚房 (Closed)

友人壽辰，約咗週五晚去唱K慶祝，小肥早收，所以就先去咗接honey，然後就喺佢屋企附近o既「中哥廚房」醫肚打底。小店於太陽落山冇耐後就經已八成滿，埋位一刻彷彿已為食客打下強心針。諗食咩前，當然係要先啤一啤佢啦！店子內外都擺出黑板推介不同菜式。鏡面同玻璃窗上則貼出多款餸菜o既彩圖及簡介。細佬就憑餐墊上及餐牌薄內多幅插圖點咗幾味小菜做當日o既頭輪晚餐。大廚特別推介之脆皮牛腩（$118）：金黃色o既脆皮牛腩外層極之鬆化乾巧，當真超級脆皮！意外地，炸煮o既牛腩一啲都唔嚡唔乾，食落厚腍入味，超！大廚特別推介之招牌士多啤梨骨（$88）：士多啤梨骨香甜爽潤，清新怡人，不過如果排骨可以切細件啲，相信會更易入口。大廚特別推介之中哥小炒皇（$90）：熱力十足o既小炒皇好夠鑊氣，韭菜脆嫩爽甜，惹味非常。欖菜肉崧炆秋葵（$75）：因為早一個禮拜喺間居酒屋度食過啲又大又好味o既秋葵，故今次點食蔬菜時一見到有秋葵食，諗都唔洗諗就叫咗黎試。以欖菜肉崧炆煮o既秋葵味濃脆身，味道極之討好。「中哥廚房」屬街坊小店，樓面伙記親切友善，其中一人雖為聾啞人士，但其細心之態度絕不比他人遜色，餐店小炒美味抵食，個人覺得絕對值得支持